Jurnalis : Lili Guntur
BANDUNG – KABAR MERDEKA | Budayawan Sunda Kabupaten Bandung,Hery Awie alias Abah Awie netelakeun pangna Gedong Budaya Sabilulungan (GBS) sepi pertunjukan alatan teu diberdayakeun. Pihak anu mibanda otoritas teu paham kana kahayang seniman budayawan Kabupaten Bandung ngeunaan ayana GBS.
“Tangtos jempling da teu diberdayakeun. Teu apaleun kudu dikumahakeun. Muga wae bupati nu bakal datang ngajak ngobrol sangkan apaleun maksud diwanguna eta gedong,” cek Abah Awie ngaliwatan pesan WhatsApp anu dikirimkeun kanu nulis, Saptu (10/8/2024).
“Salami ieu seniman budayawan pituin Kabupaten Bandung malah sering mintonkeun karyana di Kota Bandung,” kitu nu kungsi kadenge ti Abah Awie.
Ayana GBS Pangdongsok Pasebban
Sawatara taun ka tukang nu nulis kungsi ngobrol jeung inyana (Abah Awie) ngeunaan masalah GBS. Yen diwanguna GBS teh eta mangrupa obsesi para seniman budayawan Kabupaten Bandung anu tergabung dina organisasi Pasebban (Paguyuban Seniman dan Budayawan Kabupaten Bandung), sangkan kuayana GBS kreatifitas seniman budayawan di Kabupaten Bandung mingkin mekar. Turta bisa mintonkeun hasil karyana sacara mayeng di GBS.
” Ti 2002 Pasebban terus ngadorong sangkan pihak Pemkab Bandung ngawujudkeun cita-cita seniman budayawan sangkan mibanda gedong budaya,”cek Abah Awie. Anu ahirna eta kahayang teh tinekanan samangsa kapamingpinan bupati Obar Sobarna direngsekeun pangwangunanana ku Dadang Naser anu jeneng Bupati Bandung (2005 – 2010/2010 -2015).
Padahal urang Disparbud Kabupaten Bandung oge mengakui yen potensi seni budaya di Kabupaten Bandung teh kawilang leubeut,ti wit Wayang Golek, Jaipong, Silat, Teater, Calung, Seni Lukis, Karawitan,jeung sajabana. Sahingga ku Disparbud kungsi diakomodir , supaya bisa ngayakeun latihan jeung pintonan (ngamen) di selasar GBS.
“Ku ayana selasar GBS dijantenkeu tempat latihan sajumlah komunitas seni nu aya di Kabupaten Bandung sebagai bukti tanggungjawab jeung rasa cinta Disparbud Kabupaten Bandung ka para seniman pikeun bisa nampilkeun kreasina sehingga bisa diapresiasi ku masarakat.” Cek Aten Sonadi ti Disparbud kanu nulis sawatara taun kalarung . Tapi da kagiatan kituna oge ukur sageprakan, tug ka kiwari teu kadenge deui gaungna.
Cek Aten harita (2020), mun seniman budayawan Kabupaten Bandung hayang bisa konser di GBS saratna mah teu hese nu penting seni nu rek ditampilkeunana betul-betul bermutu ,profesional sarta mibanda nilai jual! Kitu basana!***
